......الغربه....... الشاعر أحمد الحامدى .......
الغربه مره وضريبتها مدفوعه
ورغم صعوبتها ملكشى كلمة مسموعة
نهارك شبه ليلك والكلمه عليك محسوبه
ومطر تعاشر فيها خلق معيوبه
الغربه ما يحسهاش إلا إللى جربها
ولا حد إنكوى بنارها إلا إللى عاش فيها
هى موجه صعبه علينا لكن لازم نعديها
وكداب إللى يقولك طلعت بسلام منيها
الغربه سرقت عمرك وأنت مش دريان
حتى لو كنت بصحتك كل شيء فيك تعبان
وسنين تجر بعضيها وأنت عايش فى الأوهام
ولو بنيت قصور منيها شوف خدت من عمرك كام
الغربة كربه بس إتكتبت على الغلبان
وأقرب ماليك إتحط فى خانة النسيان
ويوم مايعاتبك يقولك الفلوس خلتك مش إنسان
يفكر لما بتروح بتبقى رصصها فى شوال
الغربة لو حلوه مرارها كيف الصبار
ورغيفها مايتمرشى فى كتير من الناس
تبقى عامل معاها زين وبكلمه منها تلاقى دمك فار
ياما عملنا كتير معاهم وطلعة عديمة الإحساس
الغربة وطن مغشوش عايش فيه وخلاص
ودموعك على خدك طول الليل مأنساك
وتنام وتصحى على هم عديم إحساس
كأنها خلاص فى الدنيا بقيت ورثاك
الغربة صعبة لما تفارق أعز حبيب
أصيل وجدع وللعشره بيصون
ودموعة تنزل عليك لما من قدامه تغيب
ولما ترجع تلاقيه فى التراب مدفون
بس لما فارقته ما كانش بطيب خاطرك
وتعز عليك نفسك وتبكى عليه بدل الدموع دم
وغربتك بالنسبالك دى أكبر هم
ياريت بلادنا تحن علينا ومن بلاد الناس نتلم
....... الشاعر أحمد الحامدى .......
